اللي تبع المغرب فغزو الروس لاوكرانيا يدوخ. مهادن مع بوتين وصادم لميريكان والغرب. الخارجية: موقفنا مبدئي وقررنا عدم المشاركة فالتصويت اليوم

المغرب اليوم اختار موقف بوحدو بخصوص التصويت على قرار الجمعية العامة للامم المتحدة المدين لغزو روسيا لاوكرانيا. ما صوت بللا ولا بنعم ولا رفض التصويت. اللا ما جاش كاع. غاب.
وزارة الخارجية قالت فبيان شرحات فيه هاد الشي. قالت باللي واخا "المملكة المغربية قررت عدم المشاركة في التصويت على هذا القرار " فراه "ما يمكنش يكون موضوع تأويل بخصوص موقفه المبدئي المتعلق بالوضع بين فيدرالية روسيا وأوكرانيا، كما جدد التأكيد على ذلك بلاغ وزارة الشؤون الخارجية بتاريخ 26 فبراير 2022"
وزاد فبيانو باللي المملكة تواصل "بقلق وانشغال، تتبع تطور الوضع بين أوكرانيا وفدرالية روسيا".
ايلى لاحظتو المغرب ما وظفتش عبارة "غزو" او "اعتداء" او "استعمار". اختار عبارة "الوضع بين اوكرانيا وفيدرالية روسيا".
وبعدها زاد عبارة باللي المملكة عبرت عن "اسفها ازاء التصعيد العسكري" اللي ماتو فيه مئات القتلى وتسبب فمعاناة انسانية للجانبين. لاحظو عبارة "الجانبين". بقى المغرب فهاد القضية ديال التوازن. صعيب ديرها.
وهدر على تجديد الرباط "تشبثها القوي باحترام الوحدة الترابية والسيادة والوحدة الوطنية لجميع الدول الاعضاء في الامم المتحدة". هنا فقط هنا كان عندو موقف ضد الغزو الروسي اللي ما سماهش.
وزاد بلا بلا بلا بلا ديال خاص الدول تسوي مشاكلها بالوسائل السلمية كيف كيقول ميثاق الامم المتحدة وباللي بلادنا ما كتشجع على عدم اللجوء الى القوة وخاص الحوار.. كلام الديبلوماسية وصافي
الديبلوماسيين لمغاربة كيربطو هاد القرار بقضية الصحرا. ما باغينش مشاكل مع بوتين. طبعا مع هاد الرئيس راه ممكن يرسل السلاح للبوليساريو ولا ياخد شي موقف متطرف. هو هدد بالنووي. فين تزيد معاه.
لكن هاد القرار غادي يخلق مشاكل للمغرب ولحلفاؤو فالغرب. هاد الغرب كيسلح فالاوكرانيين يدافعو على ريوسهم وحنا كنهدرو على الوضع بين اوكرانيا وروسيا. قرار غادي يكون عندو تبعات