فينال مدونديال 2022.. الأرجنتين حطت يدها الأولى على كأس العالم وفرنسا رجعت مغبونة للفيستيير

سالا الشوط الأول من ماتش فينال كأس العالم قطر 2022، بتقدم الأرجنتين على فرنسا اليوم الأحد فتيران لوسيل بالعاصمة القطرية الدوحة.
وقدر منتخب الأرجنتيني يخرج متقدم بنتيجة 2 أهداف لزيرو أمام فرنسا، وسجل الهدف الأول الكابيتان ديال المنتخب الأرجنتيني ليونيل ميسي من ضربة جزاء تحصل عليها أنخيل ديماريا فالدقيقة 23، ومن كونتر أتاك قدرو اللعابا الارجنتنيين يسجلو الهدف الثاني بواسطة أنخيل ديماريا فالدقيقة 36، وظلت النتيجة كيفما هي سالا الشوط الأول اللي مسيطرة عليه الارجنتين بقيادة المدرب سكالوني من جميع النواحي قدام عجز فرنسي واضح حيث المدرب ديدي ديشان ما وحدش الحلول، مع العلم أنه غير مع نهاية الشوط وخرج عثمان ديمبيلي واولفييه جيرود، ودخل كل من كولو مواني وماركوس تيرام.
وبهاد النتيجة اللي سالا بها الشوط الأول كيوضع منتخب الأرجنتين الرجل ديالو فمنصة التتويج وفطريقو للتتويج بكأس العالم للمرة الثالثة فالتاريخ ديالو، فالوقت اللي مطالبة فرنسا بريمونتادا فالشوط الثاني وتسجل 2 أهداف إن أرادت الحفاظ على حظوظها فالحفاظ على اللقب اللي ربحت فمونديال 2018، وتربح حتى هي كأس العالم للمرة الثالثة فالتاريخ ديالها.