خطير.. اتهامات للبدراوي باستغلال صفقات مشبوهة على حساب الرجاء فيها لاعبين ومستشهرين

فاق الرأي العام الرياضي صباح اليوم على انفجار حقائق خطيرة كتهم نادي الرجاء الرياضي والطريقة اللي كيتسير بها، وبطلها عزيز البدراوي رئيس النادي وشي وحدين معه.
https://www.facebook.com/100089907995852/videos/885986692468906/?mibextid=Nif5oz
وحسب فيديو تنشر على مواقع التواصل الاجتماعي فواحد الشخص كيديعي انه كان خدام مع شي كروب تخت قيادة رئيس الرجاء الرياضي عزيز البدراوي، والهدف كان هو استغلال الرجاء للقيام بصفقات مشبوهة على حساب الرجاء وتقاسم الارباح ديالها، وإضافة إلى "سريح" الجمهور من خلال نشر معطيات مغلوطة على صفحات مواقع التواصل الاجتماعي ومحاولة اغراء الخصوم ديالهم والهجوم الإلكتروني على أي واحد رفض يمشي معهم في اللعبة.
الشخص اللي تحدث في الفيديو المذكور قال بلي هو مقيم خارج المغرب، وكشف أنه كان مع لكروب اللي كيشرف عليه عزيز البدراوي، وأن السبب اللي خلاه ينشق عليهم ويخرج يفضحهم هو أنهم رفضوا بتقاسموا معه أرباح شي صفقات فيها نصب واحتيال باسم الرجاء فقرر يخرج ويفركع الرمانة، وأنه من بين الصفقات المشبوهة واللي تم فيها النصب والاحتيال باسم الرجاء كاين صفقات لاعبين سنا معهم عزيز البدراوي ولكن ما لعبوش حتى ماتش في الرجاء وكاين فيهم اللي ما جا حتى لمركب الوازيس، ومن بينهم اللاعب الجزائري المهدي بوكاسي والليبيري بيتر ويلسون واللاعب سانوكو وقال أن عزيز البدراوي واللي معه استفادو من صفقة اللاعبين المذكورين، وكيستغلو الثغرات والوضعية الصعيبة ديال اللاعبين مقابل انهم يستافدو ماديا من صفقاتهم على حساب الرجاء بحيث أن الفريق تحت أشرف البدراوي كيفسخ العقد مع اللاعب والأخير كيمشي للفيفا والطاس وكيحكمو على الرجاء تأدية الشرط الجزائي للاعب وهم كيضغطو على اللاعب باش يعطيهم نصيبهم حيث شادين عليه شي حاجة ضدو، وهذا الشي كيديروه حتى مع المستشهرين وعطى المتحدث مثال بواحد الشركة إيطالية ديال الحيوانات واللي كانت غادير اشهار بالفريق وما دارتوش.
المتحدث كان كيتكلم في الفيديو مع واحد من أصحاب الصفحات الرجاوية اللي رفض الانضمام إلى كروب عزيز البدراوي واخا حاولوا يغريوه بأجر 40 ألف درهم مقابل ينخرط معهم في سريح الجمهور، حسب ما قالوا هما الأثنين، وكشف المتحدث أن هذا الكروب فيه عدد من الأشخاص اللي كيخدموا تحت قيادة البدراوي، ولكن ركز بزاف على واحد الشخص وهي صحافية الاسم ديال "ف.ح" وهي اللي مكلفها البدراوي بتتبع والإشراف على أي حاجة على مواقع التواصل الاجتماعي وانها أدمين فجميع الصفحات اللي كيخدمو بها وكيسرحو بها الجمهور وما كيناش شي حاجة كتكتب أو كتنشر إلا وكتكون فالعلم ديالها ودازت على يديها.
الأكثر من هذا فالشخص اللي كان كيتكلم فالفيديو ورفض يكشف على الهوية ديالو، قال أن الصحافية "ف.ح" داخلة حتى الصفقات المشبوهة وماشي فقط تسيير ليباج اللي كيخدمو بها وكيروجو بها المغالطات، تحدث على صفقة اللاعب الجزائري المهدي بوكاسي اللي انتقل إلى البطولة الفيلاندية من بعد أشهر ديال الشوماج في الرجاء حيث عجز يدير بلاصتو، وقال أن إدارة الرجاء الرياضي برئاسة عزيز البدراوي كانت مسكنا بوكاسي بواحد من الفنادق المعروفة بكازا ديال 5 النجوم بشارع الجيش الملكي مقابل 2000 درهم في الليلة الواحدة كيخلصها النادي، ولكن اللاعب كان كيمشي للفندق غير مرة واحدة في الشهر باش يبانتي وبالمقابل فهو كان ساكن بشقة كاينة بشارع غاندي في ملكية خالة الصحافية "ف.ح" والأخيرة كيعطيها البدراوي الباي ديالها.
الشخص اللي كشف هذه التفاصيل قال بأن الرجاء الرياضي كتسناه سنوات عجاف والأزمة غدي طول بالنادي حيث الرئيس عزيز البدراوي واللي معه غرقو الفريق، وأن البدراوي كيتسنى شي فلوس تدخل ديال مشاركة الرجاء في كأس الملك سلمان "البطولة العربية" باش يدير توازن في التقرير المالي ويعقد الجمع العام ويسلت بحالو بلا حساب.
لحد الساعة مكتب الرجاء ما خرج حتى بيان.