حديث الزلافة الحريرية الرمضانية -13-

حديث الزلافة الحريرية الرمضانية
في وصف دوا الحمار
ووزارة الصحة والراحة
(الحلقة الثالثة عشر)
جائزة قناة الحريرة للأفلام الخاسرة
بطولة: حبوب الدنفراوي prefix = u1
سيناريو وحوار : محمد
القصة: سعيد
الإخراج: الوافي
اللقطات الخارجية : حميدو المسالي قبو
الموسيقى التصويرية : علال النفار
إنتاج: دار المصائب للأفلام المزورة
بعد العياذ بالله من الشيطان الرجيم والصلاة والسلام على سيدنا محمد سيد الخلق وخاتم النبيئين و المرسلين صلى الله عليه وسلم وعلى آله وصحبه أجمعين.
قرقبوا عليها سوارت الربح ولي ما صلى على النبي يمشي لجهنم.
- بعد لهيه أمسخوط الوالدين .. وانت يا المكلخ شد لخوك الطانسيون وكتبو فشي ورقة حتى يرجع الطبيب من الكونجي الشهر الجاي..
- ولكن راه خويا مات أسي الفرملي
- الفرملي هو راجل مك .. أنا مساعد دكتور.. آ السالوبار
- ماشي مشكلة بجوككم بحال بحال .. ما فيكم ثقة .. شفارا غشاشا . اقتلتو خويا بإهمالكم الله ينتقم منكم
- آسمع أذاك الغافل .. خوك بعدا راه كان ميت .. وهو غادي على رجليه .. من نهار خدا الإجازة في الفلسفة وهو مشومر .. عايش بالسيف عليه .. سير أولدي الله يسهليك في حرقة ساهلة لسبانيا ..
- أنا بغيت نبقى فبلادي .. بت إهنا ننبت .. باغي نولي مهندس معماري..ما بغيت خارج
- شد .. شد مزيان ..وتا شد المسخوط
- آش راك تدير ..
- ولازم نزوليه أي حاجة معدنية .. هاذي سنة من الذهب ممنوع يدخل للفريكو بها
- وشكون لي دار هاذ القانون
- ما شي مشكلة شكون لي دارو .. المهم .. هو راه قانون
- آحيد يديك من خويا .. ما تقيسوش .. قاليك باغي حيدليه الميطال .. رباعة الشفارا
مرض المسكين علقوه من شفار عينيه
بيعوه ولادو فسوق النخاسة
ربطو يديه ورجليه
مرض الميسور سرجوه بالجاه العالي
عطروه ومسكوه بالكياسة
وشوشو الناموس عليه
مرض المقهور زيدوه حتى تعما عينيه
وقدموه كي البخوش للمداسة
يندم النهار لي خلق فيه
- قلتليك ألالا راه الفراش الوحيد إلي كان .. تباع .. ما بقاو عندي فراشات .. واك واك الحق فين باغياني نحط ولدك فوق راسي.؟
- أنا مزاوكة فيك أسي الفرملي .. شوف فينا لوجه الله تعالى
- راني مساعد دكتور .. أوجه الحبس.. واش ما شايفاش لون الطابلية؟!!
- واخا السي الدكتور .. غير شوفلينا شي فراش واخا فلاكاف
- لاكاف ؟؟!! .. علا لاكاف سهلتيها آو .. لاكاف أمويمتي راه ساكنين فيها ستة تاع الأطبا عزارا .. ومعاهم خمسة تاع الفرلمليات كلا وحدة تنسيك فلخرى
- يا ويلي .. علا الدولة دايرة لاكاف للعيانين ولا باش تحاربو فيها أزمة السكن
- إيوا دبا ملي وليتي تدوي فالسياسة .. تقاضاو عندي الحلول .. بغيتي ولدك يتعالج خذيه لمستشفى خاص..
- ما عندي فلوس آسيدي .. علا إلي ما عندو فلوس ما يمرضش
- لاش ولدتيه .. لاش تجوجتي .. لا ش خلقتي .. لاش .... آودي لاش أصلا.. أصلا الدوا الحمر راه خسارة فيكم
- آسيدي الولد تيموت
- خليه .. يرتاح .. لاش باغياه يعيش .. باش يطلع شفار .. وشي نهار يقتلك .. وزيدون راه اليوم كاين ماتش تاع البرازيل الأطبا كلهم كونجي ..
- الله ياخذ فيكم الحق.. الله يبليكم كيما بليتونا .. حسبنا الله ونعم الوكيل .. حسبنا الله ونعم الوكيل.. مات وليدي
مات وليدي يا السيادي .... و قدام عيني شايفاه
مات مغدور داك الغالي ... الفقسة فالقلب شاداه
عاش باكي لباسو البالي ... وهموم الدنيا ساكناه
عاش شاكي جيبه خاوي... يعد النجوم في سماه
المحضر :
نحن المفتش المكلف و المسؤول عن تحري الحقائق الحقيقية والتحقق من كل حقيقة حق الحق في أحقيتها وتحققت في حقها كل الحقوق أن الفرملي فرعون لم يكن موجودا في المستشفى ليلة تعرض المريضة الكدابة بنت البهتان الباطل للإغتصاب .. والدليل هو أن بعض الشهود رأوه وهو يغادر المستشفى على متن سيارة المدير حوالي الساعة الثامنة ليلا وبذلك تأكدنا من براءة المتهم المسكين وأمرنا بإغلاق الملف وحرر بحانة السعادة في ساعته وتاريخه..
وأقفل المحضر
كتبه محبوب الدنفراوي في الجامع المائع في وصف حال الشعب الجائع.
التعليق على المحضر
إخواني الزلايفية أخواتي الزلايفيات .. اسمحو لي أن أنقل إلى حضراتكم هذا القرار الذي تخيلته صادرا إن شاء الله في يوم من الأيام
إلى جميع المواطنين والمواطنات, من درجة مزلوط فما تحت.. نخبركم أنه يمنع منعا كليا المرض الفجائي دون إذن الدولة .. وبما أننا نريد تشجيع النظام والتناوب فقد قررنا أن نفتح لوائح لتسجيل المرضى ومن يعتقدون أنهم سيمرضون .. ونذكركم أنه سيعاقب كل شخص سجل إسمه واكتشفنا بأنه لم يمرض ..
كما ننبهكم أنه يجب على كل مريض جاء دوره لدخول المسترشى أن يحضر معه بعض الزاد وبعض المال وبعض علب المالبورو الأحمر .. وبطانيتين وحدة للفراش وحدة للغطا.. كما نشدد على من تجاوز عمرهم الستين بضرورة إحضار ممرض وطبيب معهم للمستشفى حتى نضمن حسن رعايتهم..
أما الأدوية فإن الدولة تتكفل بجميع أنواع دوا الحمار
إلي فيه الرواح ممنوع عليه دخول المستشفى حتى لا يعدي باقي النزلاء
إلي فيه الكحة يجب أن يحضر معه كمامة كاتمة للصوت حتى لا يزعج راحة الممرضين
وتؤكد وزارة الصحة أنها قررت منح جائزة تقديرية لكل مواطن مريض كتم مرضه وأخفاه حتى الموت وذلك بإعفاءه من ضريبة القبروتسليم أهله كفنا من نوع تيركال أبيض ناصع من النوعية المضادة للبخوش.
موتو فبيوتكم خيرليكم
مرضو فبلاد النصارا
السبيطارات اتخصصات
ولا كلنيك جديد
بين كل عمارة وعمارة
ولي ما عند بوه فلوس
احسنلو يموت وحياتو خسارة
أعزائي القراء تقاضت زلافتنا اليوم وإلى اللقاء غدا مع زلافة جديدة و أدعوكم للإستماع لحلقات الزلافة الحريرية الرمضانية في إخراج إذاعي على الرابط التالي
www.moroccopost.net