صحيفة صبليونية: سانشيث ماشي غير مشى بعيد فدعم المغرب فالصحرا بل دعم 3 مشاريع ملكية كلها لتأكيد مغربية الصحرا

ركزات جريدة "ال كونفيدانثيال" الالكترونية بزاف علي زيارة رئيس الحكومة الصبليوني بيدرو سانشيث للمغرب البارح ولقاؤو بالملك محمد السادس.
اللي همهم هو اشناهو المقابل اللي خداه رئيس حكومتهم من المغرب باش يزيد يؤكد دعمو لمغربية الصحرا من خلال "تجديدو البارح للملك محمد السادس "التأكيد على موقف إسبانيا الوارد في البيان المشترك لأبريل 2022، الذي يعتبر المبادرة المغربية للحكم الذاتي بمثابة الأساس الأكثر جدية وواقعية ومصداقية من أجل تسوية هذا الخلاف".
كيهدرو طبعا على فتح نقط جمركية بين المغرب ومدينتيه المحتلتين سبتة ومليلية بالاضافة الى يعاونهم بزاف بزاف فمحاربة الهجرة السرية.
هاد الشي ديال الجمارك ما جبدوش لا بيان الديوان الملكي ولا رئيس حكومتهم.
صحيفة "الكونفيدانسيال" اللي باينة فيها تفقصات٬ قالت باللي سانشيث دعم مبادرات ملكية كتصب فدعم مغربية الصحرا. كيهدرو على اشادة رئيس الحكومة و تأكيدو على اهتمام اسبانيا بالمبادرات الاستراتيجية اللي طلقها سيدنا باش يكون عند بلاد الساحل ولوج للمحيط الاطلسي. بالاضافة الى نقطة اخرى وهي أنبوب الغاز الإفريقي الأطلسي نيجيريا – المغرب.
بيان الديوان الملكي البارح جا فيه "وقد أعرب رئيس الحكومة الإسبانية عن إشادته وتأكيده على اهتمام إسبانيا بالمبادرات الاستراتيجية التي أطلقها جلالة الملك، نصره الله، خاصة مبادرة البلدان الإفريقية المطلة على المحيط الأطلسي، والمبادرة الملكية لتعزيز ولوج بلدان الساحل إلى المحيط الأطلسي، وكذا أنبوب الغاز الإفريقي الأطلسي نيجيريا – المغرب".
وكانت مراكش حتضنات بعد خطاب سيدنا فالموضوع اللي طلق فيه المبادرة الاستراتيجية٬ اجتماع ف22 دجنبر 2023 اجتماع وزاري حضرات فيه دول الساحل: النيجر وتشاد وبوركينافاسو وتشاد باش يكون عندهم ولوج للمحيط الاطلسي. طبعا هاد الولوج غادي يكون علي ميناء الداخلة اللي كيتصايب.
دعم سانشيث لهاد المبادرة ماشي مجاني كيف هدرات عليه هاد الجريدة الاسبانية٬ غادية تستافد منو مقاولات الجارة الشمالية وبزاف.
سانشيث كان اكد البارح باللي مدريد والرباط "شريكان استراتيجيان" يعززان "نموذجا للجوار البناء القائم على الثقة والاحترام المتبادل". واضاف فتدوينة علي "اكس" باللي "خلال زيارتي للمغرب، نعطي زخما جديدا لتعاوننا في جميع المجالات ونعمل على ترسيخ نموذج الجوار البناء القائم على الثقة والاحترام المتبادل".