سب وابتزاز وتشهير ف2019.. قضية “حمزة مون بيبي”: سكينة گلامور فالحبس.. دنيا وابتسام باطمة عاد طلقوهم البوليس والسيمو بنبشير كيتسنا نوبتو

أكثر قضية دارت الرواج في الانترنت خصوصا ما بين انستكَرام وسناب شات هي قضية”حمزة مون بيبي” لي منوض كان منوض الشياط غير بوحدو وبلا حشمة بلا حيا كيبتز ويشهر في عباد الله ويسب ويعاير بحالا ماكاين مخزن في البلاد.
هاد الكونط دار خبلة وشتت أسر وقضا على حياة بعض الناس، ولعل أكثر وحدة كلات الدق من منو هي الاعلامية مريم سعيد لي كان حط ليها تصاور حميمية ديالها وشهر بيها بطريقة خايبة بزاف خلاها ماتبقاش تبان في مواقع التواصل وحتى القناة لي كانت خدامة فيها خواتها.
في عام هاد الحساب دار مابغا ماخلا مشاهير ماخلا ناس عاديين، كان شعارو التهديد وضريب الطر.
لكن في شهر شتنبر البوليس قرقبو على شخص جبد أسماء أخرى من بينهم صحافي في مراكش، والبلوگوز سكينة الملقبة ب”كَلامور” وشخص ثالث عندو محل ديال كراء الطوموبيلات، ودنيا وابتسام باطمة والسيمو بنبشير.
حاليا، سكينة گلامور مشدودة فالحبس، ودنيا باطمة وختها ابتسام شدوهم البوليس واستامعو ليهم مدة اكثر من 16 الساعة وطلقوهم. اما السيمو بنبشير فقرر مايدخلش للمغرب وماحضرش حتى لمهرجان الفيلم فمراكش لي عمرو مافلت، ودابا كولشي كيتسنا نوبتو تجي.
ضحايا هاد الناس كثار والقضاء مازال كيحقق مع كل واحد والقضية مازال طويلة.