بؤرة جديدة دكورونا بانت فالعرايش فمؤسسة عمومية.. والمندوب الإقليمي ل"كود": هذ البؤرة فيها 7 دالأشخاص.. وبؤرة معمل السردين وصلات ل57 شخص.. والحالة ديال المصابين كاملين لا تدعو للقلق

كشف المندوب الإقليمي لوزارة الصحة فالعرايش، عبد السلام الذهبي، بللي اليوم بانت بؤرة جديدة ديال الإصابات بفيروس كورونا فالعرايش، والامر كيتعلق بمؤسسة عمومية خاصة بالإيواء وتابعة للدولة، واللي بلغ عدد المصابين فيها ل7 أشخاص لحد الساعة.
ورفض الذهبي، فتصريح ل"كود"، الكشف على إسم المؤسسة أو يحدد واش كيتعلق الأمر بمؤسسة سجنية أو او خاصة بالرعاية الاجتماعية، لكنه فالمقابل أكد بللي الإصابات ب7 كتتعلق ب4 ديال الموظفين و3 ديال النزلاء.
بالنسبة للبؤرة الصناعية ديال معمل السردين المصبر، كشف المندوب الإقليمي بللي عدد المصابين فيها وصل ل57 شخص، واكد بللي البعض فيهم كيتعالج فالمركز الاستشفائي لالة مريم، والبعض الآخر سافطوه لوحدة القصر الكبير اللي تابعة لنفس المستشفى.
وبالنسبة لأسباب انتشار العدوى بشكل كبير فالبؤرتين معا فالعرايش، كيقول المندوب الإقليمي بللي صعيب يتم تحديدها "وبالنسبة للرواية اللي كتقول بللي العاملات تقاسو بكورونا فمعمل السردين بسبب باكيات جاوهم من سبانيا فهذا كيبقى مجرد احتمال، لكن السبب الحقيقي صعيب تعرفو"، على حساب ما قال.
ونفى الذهبي ما يروج بخصوص الاكتظاظ اللي كتعرف الوحدة ديال العرايش، وقال بللي المندوبية الإقليمية متبعة مخطط محكم ديال توزيع المصابين على الوحدات الاستشفائية، "وراه كلهم فصحة جيدة وحالاتهم لا تدعو للقلق، وحنا رسلناهم للقصر لكبير تتبعا للمخطط اللي عندنا وصافي، والأسرة مازال كاينة فالوحدتين معا"، على حساب هضرتو.
وقال بللي المخطط مافيهش غير المستشفيين، لكن فيه حتى المؤسسات العمومية والمستشفيلت الخاصة اللي ممكن يتم ولوجها، كذلك الفنادق ومؤسسات عمومية أخرى بحال دور الطالب والداخليات، والتدبير ديال الأسرة غيكون تبعا لهذ المخطط.
وللإشارة علنات المندوبية، هذ الصباح فرسم آنفوكَرافيك فلاباج ديالها ف"فيسبوك"، على ارتفاع عدد الإصابات بفيروس كورونا المستجد ل72 إصابة فالعرايش فالمجموع، باش يوصل عدد الإصابات فالطوطال كامل دالجهة الشمالية ل461 حالة.
ونشرات المندوبية، لبارح الثلاثاء، بلاغ إخباري عمماتو على الصحافيين، كتقول فيه بللي عندها لحد الساعة 120 سرير فالعرايش والقصر الكبير، وممكن الطاقة ديالها الاستعابية توصل ل500 سرير إلى استعنات بالفنادق والداخليات ومجموعة من المؤسسات الأخرى.