واش بلادنا ولات اغنى بلاد فالعالم؟ ما كايناش شي دولة سادة حدودها وحتى اليابان واسرائيل غير عرفو "اوميكرون" ماشي خطير فتحو حدودهم وهولندا سدات لبلاد الا الحدود

الدولة المحترمة ديالنا بمؤسساتها فرقات مهمة وحدة وهي "سدان لبلاد". مرة كيعلن على اغلاق لبلاد وزارة الصحة ومرة وزارة الخارجية ومرة الحكومة كلها مرة "لارام" ومرة المكتب الوطني للمطارات. دابا هادي شي شهر باش سدينا الحدود. النتيجة كارثية وحتى حد ما كيحاسب هاد المسؤولين. دخلات "اوميكرون" بلا ما يشرحو لينا كيفاش وعلاش. هاد المتحور غادي ويكثر كيف دول العالم٬ ولكن بلى خطورة كيف كانت توقعات منظمة الصحة العالمية فاللول.
الدراسات اللي خرجات لحد الان على هاد المتحور فجنوب افريقيا وبريطانيا كلها تفاؤل. الحكومة والدولة المغربية فراسها هاد النتائج. علاش هاد العناد فالاغلاق.
كلشي عارف الاغلاق ديال الحدود غير مبرر. فاللول كان جهل بهاد المتحور. كان تبرير للاغلاق. دارتها اسرائيل. دارتها اليابان. لكن هاد الدول الغنية بزاف بزاف علينا٬ دارت اغلاق قصير ورجعات فتحات الحدود ديالها. بحال دول العالم دارت اجراءات باش تحمي هاد الحدود.
حنا سدينا وفتحنا غير باش نرجعو لمغاربة اللي حصلو برا. بعد ايام رجعنا سدينا. كلشي كيبان عبثي. عشوائي. ها اللي رجعو من برا لقاو فيهم "اوميكرون" وقبل لقيناه بيناتنا. واخا هاد لفضايح ما تفتح حتى شي تحقيق مع وزارة الصحة على تقصيرها. التقصير ماشي كيفاش دخل٬ اللا؟ كيفاش ما قدراتش تبعو.
بعد اعلان اول حالة فالبلاد ما بقى حتى معنى لاغلاق الحدود. راه الاغلاق مكلف بزاف بزاف. كيقتل قطاع السياحة. كيقتل الخطوط الملكية المغربية. كيقتل مكتب المطارات. كيقتل الاقتصاد المغربي اللي كيعتامد على السياحة.
كاين طرق كثيرة دارتها دول وقوية اقتصاديا وما قدراتش تسد٬ وهي مراقبة الحدود. راه ايلى الدولة المغربية دارت مختبرات تحت اشراف وزارة الصحة٬ البي سي ار السريع لجميع اللي كيدخلو المغرب فالمطار وفابور٬ تخرج رابحة. الاقتصاد يربح. الرواج يبقى.
طبعا كاين حل اخر هو ان جميع اللي باغي يدخل للمغرب. ايلى دولتنا بغات تزير بزاف٬ تفرض "بي سي ار" 48 ساعة بالاضافة الى تيست اخر فالمطار ويخلصو المسافر قبل ما يطلع. يدوز على "لارام" فالبيي. مثلا ايلى كانت البيي ب2000 درهم يزيد 300 درهم خاصة بكلفة البي سي ار. هاد التيست يدار فالمطار. قبل ما يوصل المسافر عند البوليس. ايلى كان سلبي يمشي فحالو ولا كان ايجابي٬ يمشي لاوطيل على حسابو.
هاديك القضية ديال الدولة تخلص على المواطنين لمغاربة اللي حصلو برا او على غيرهم لوطيل راه تخربيقة كبيرة.
علاش كنتصرفو بهاد الغباء باش نسدو الحدود. باش نقبلو نفتحوهم وفنفس الوقت نديرو المجانية للي دارو "لاكارانتين" فلوطيلات. علاش كنلوحو فلوس الدولة فالرملة.
خاص مراجعة قرارات كثيرة. راه كندورو فحلقة مغلقة نتائجها كارثية على لبلاد. حقاش غير كنخسرو فيها والفيروس اللي كنا خايفين منو غادي ويكثر. يعني السبب علاش سدينا انتفى. ما بقاش.