وعلاش اللا راية فلسطين ما يهزهاش ياميق والصابيري وغيرهم. واش الكورة غير رياضة راها تصريف لمواقف الدولة ورسالة من قبل الدوحة للجزائر وغيرها وشوف غير علاش فين ما ربحنا أول مراسلة للأفراح كتكون من غزة وماشي حتى الضفة

قريت مقال "كود" على الراية فاحتفالات الأسود بالتأهل لربع نهاية كأس العالم قطر 2022. متفق مع الطرح باللي خاص تكون الراية المغربية الحمرا مولات النجمة الخماسية الخضرا فنوعية من الاحتفالات ولكن مختالف على الموقف من الراية الفلسطينية او غيرها فهاد البطولة بالضبط.
الكورة راها ماشي غير رياضة. كلشي بان على عينيك اش وقع باش تأهلنا. كيفاش العالم هدر على المغرب وسوق لبلاد ولفرحة بلاد. رئيس الدولة ما عمرو لبس التوني ديال المغرب وخرج يحتافل مع الشعب واخا ماشي نشاط رسمي بل تلقائي نقلو التلفزيون الرسمي اييه الاولى نقلات هاد الحدث.
يعني المغرب عندو مواقف فدعم القضية الفلسطينية. تعرض هنا فالدوحة فالبطولة العربية اللي كانت دازت لتخوين وهجوم على جماهيرو خاصة من بعض الجزائريين. بلا ما نهدرو على المخططات اللي طلقاتها الجزائر وغيرها من الدول اللي معاها على المغرب من نهار توقع اتفاقية ابراهام فشقها المغربي: الاعتراف بمغربية الصحراء من قبل الولايات المتحدة الأمريكية مقابل عودة للعلاقات المغربية الإسرائيلية.
حتى السلطة الفلسطينية هاجمت بعض قياداتها المغرب. هنا الرباط لعباتها مع حماس. هادا ما يفسر فهاد المونديال أن النشرة الرئيسية فالتلفزيون الرسمي المغربي "الأولى" التابع للشركة الوطنية للإذاعة والتلفزيون٬ كتكون من غزة. اييه. ماشي من الضفة الغربية. ولى عند "الأولى" مراسل من تماك بأوامر عليا. ما عاطياش إسرائيل الرخصة باش يدخل. هنا علاش بان لي باللي لا ياميق ولا الصابيري باش هزو الراية ديال فلسطين راه كان خدمة لدعم المغرب لفلسطين لهاد القضية وفالمقابل راه عندو علاقة مع إسرائيل اللي يمكن تسمح ليه يدافع مرة مرة على هاد القضية كيف وقع فبعض الأحداث.
مع تكون راية فلسطين فالاحتفالات. تكون وسط الدوحة اللي عايشين فيها قياداتها خاصة صحاب حماس. مع يوظف المغرب هاد الماتشات بذكاء كيف داير دابا لإظهار موقف شعبي أولا ورسمي ثانيا. الشعب فرحان باش كيشوف راية فلسطين ومؤسسات الدولة من خلال الجامعة الملكية لكرة القدم أو غيرها راها هي اللي كتسمح باش تهز هاد الراية.
فتقديري حل ذكي. حل مغربي كيف كنعرفوه بعض المرات فقضايا معقدة. لقى كيفاش يخرج راسو. كل فلسطين مع المغاربة هاد ليام. فالدوحة تلقاهم مع حماس أو ضدها ولكن كيعتابرو ريوسهم اليوم مغاربة. غير هادي بوحدها راه إنجاز كبير. بعد ما حاولات دول ومنها الجزائر تلصق ليك تيكيتا الخيانة لهاد القضية المركزية فوجدان تيار كبير بزاف مما يسمى العالمين العربي والإسلامي٬ ولى المدافع الأول على هاد القضية دوليا هم الأسود. هم المغاربة.