الخرباقة قالك ا سيدي ماتضامنوش مع فرانسا لي كانت مستعمرانا وعلاش نتضامنو مع فرانسا وننساو اخواننا في فلسطين وسوريا و العراق !

الاحداث الاخيرة فباريس لا كانت بينات على واحد الحاجة فهي بينات على انه بزاف ديال الناس عايشين بيناتنا وسط منهم دواعش صغيرة قابلة للانفجار في أي لحظة ! بينات انه بنادم وصل لواحد الدرجة ولا مخربق ! عايش وسط الهلوسة و نظرية المؤامرة !
بزاف ديال البباغاوات بانو، كلهم عندهم هدف واحد، هو يلقاو شي سبة باش مايتضامنوش مع باريس في اطار خالف تعرف ! كاين لي قالك أنا مانتضامنش حيت فرانسا استعمراتنا و خدات ليها الخيرات و ديك الهضرة لي قرينا فالمقرر ديال التاريخ فالابتدائي! اوك هاد الهضرة كانت صالحة فالابتدائي و لكن من بعد كبرنا و عرفنا أنو الانسانية من نهار تسمات انسانية و الحروب كاينة بين الدول ! و القوي يستعمر الضعيف ! حتى الدولة العثمانية استعمرات النص فاوروبا و آسيا و افريقيا واش مانتضامنوش معاهم اليوم فدوك الانفجارات لي وقعو فانقرة ؟
واش ينوضو الاوروبيين يضربو تركيا انتقاما من سنوات الاستعمار ؟ المغاربة براسهم دخلو لشبه الجزيرة الايبيرية نهار كانت عندهم قوة عسكرية كاتسمح ليهم ! كايعجبنا نسمعوا ديك الهضرة ديال خالد بن اللوليد " البحر ورائكم و العدو امامكم " كانحسو بالفخر فاش كانقراوها فالمدرسة ! هاداك ماكانش استعمار كان كومبينغ ! رحلة جماعية مشاو هازين فيها النعناع و بلعمان ماشي السيوفة ! العرب براسهم جاو من شبه الجزيرة العربية و سيطروا على منطقة شمال افريقيا، الاستعمار جاري به العمل ! ماشي غير فرانسا لي ستعمرات دول ! حتى حنا استعمرنا !و لكن حنا طبعا ديما كانشوفو راسنا زوينين ! ماعلينا والو ! ماكانسميوهش استعمار كانلقاو ليه سميات زوينين …
الفرقة الثانية ديال المعارضين و هوما لي كثار بزاف هوما صحاب" لماذا تتضامنون مع باريس و اخوانكم في سوريا يموتون كل يوم ! في فلسطين يموتون كل يوم ، في العراق و ليبيا و كينيا … كل يوم" وا هانتونما قلتوها يموتون كل يوم، و بزاف نتضامنو معاهم كل يوم ماغانوضوش نخدموا على راسنا؟! هادو نيت لي كايدويو على اخواننا في فلسطين راهم كايضامنو معاهم غي فاطار انا و اخويا على بن عمي و انا و بن عمي على الغريب و ماكايتفكرو فلسطين تال فحال هاد المناسبات كايجبدوها فحال لا جابدين شي ضوسي قديم و غامل ينفضو عليه الغبرة ! معلوم العالم يتضامن مع باريس! راه سميتها باريس ا بوعو ! عاصمة المودا و الجمال ! باريس عاصمة فرانسا !فرانسا الحضارة ! الاقتصاد ! التقدم التكنولوجي ! فرنسا الثورة الفرنسية ! فرنسا الفلسفة و الرسم! فرنسا لي ختارعات الفاكسان ديال الليشمانيوز و اكتاشفات السيدا !لي ختارعات الآلة الحاسبة!الطوموبيل !القراية للعميين بطريقة براي! خرجات شحال من عمى من الظلمات الى النور و خرجات معاه الانسانية ! فرانسا لي دخلات للمغرب ستيلو بيك فوقت كان بنادم مازال مضارب مع الريشة و المداد! فرانسا لي قدمات للانسانية بزاااااف ! بزااااف ! فمن الطبيعي التضامن معاها يجي من العالم كلو و من الطبيعي الناس يهزو الراية ديال فرانسا فالبرازيل و ميريكان و الطاليان و الجابون و سيدني… شنو قدمتو نتوما؟ و الاهم من شنو قدمتو هو فين وصلتو بداكشي لي قدمتو اليوم ؟ هضر معايا على اليوم و حكي ليا على حالتك اليوم نقولك التضامن واش تستاهلو و لا ماتستاهلوش ! المثل المغربي كايقول على قد فراشك مد رجليك ! و على قد ما قدمتي للانسانية راه غاتضامن معاك ! ايه حيت حتى فالتضامن كاين فرق!و كاين فرق بين واحد خرج يشرب قهوة آمنا مطمئنا حتى لقا راسو ميت بكالاشنيكوف و واحد عارف راسو عايش فحالة حرب منذ ابد الدهر! مقاتل مع خوتو و ولاد عمامو و موالفين بالسلاح و الدم و صوت القنبول…
كاع الناس لي تضامنو مع فرانسا تضامنو معاها بلا داك فريع الراس ديال نظرية المؤامرة ! الا حنايا طبعا! الا حنايا لي من نهار عقلنا على راسنا و حنا كانتخايلو راه شي حد تابعنا باغي يقتلنا و يصفيها لينا … راه لخرين خايبين ماحامليناش ! حتى من العلاقات الانسانية ديالنا رضيناها ملوثة ، تلوثات بدوك الافكار العشوائية ! التضامن راه تضامن ديال انسان مع انسان ! بغض النظر على اللون وللعرق و الديانة !