الملياردير بلحاج صرفق الفعفاع ولكن كان جبان فتحليلو. وقف غير على استقلالية الباطرونا بحال ايلى مع مريم بنصالح ما كانتش تابعة لحزبكم التراكتور

الملياردير علي بلحاج ولد التراكتور حزب الاصالة والمعاصرة صرفق الففعاع صلاح الدين مزوار.
كتب تدوينة على صفحتو على الفايسبوك قال فيها على خبار ترشح الفعفعاع لرئاسة الباطرونا وبداها باللي ماشي كذبة ابريل واخا مازال هاد الشهر ما دخلش.
واضاف “رأيي ما عندو علاقة بالشخص. كيبان لي ضريف وكيتواصل بذكاء والبركة معاه حلوة” ثم كتب “اللي صدمني هو كيقدمو لهاد المنصب= كيقصد المخزن اللي هو جزء فبنيتو ولكن ما قدرش يقولها= خادم من خدام الدولة كان وزير بزافت المرات ولكمالة وزير المالية.
هاد لشي اعتبارو الملياردير اضعاف للباطرونا. وهنا بان جبان حقاش ما كملش اش بغى يقول. حقاش ختم “الباطرونا خاصها تبقى نقابة لرجال الاعمال وخاصها تبقى مستقلة على الحكومة وعلى الاحزاب”. وكذب علينا وعلى لمغاربة كاملين باق قال “باش تبقى كيف هي من مؤسسات الوساطة اللي مازال واقفة” ما طاحتش.
علاش كذب حقاش الباطرونا من نهار جات بنت جهتك مريم بنصالح وهي كدير السياسة. ركبات فالتراكتور ديالكم وصوتات لرئيس مجلس المستشارين معاه وانتاخبات حكيم بنشماس وهاجمات بنكيران باش كانت جهة فالمخزن ضدو. يعني السياسة بداتها الباطرونا مع بنصالح ماشي غادية تبدل ايلى جا الفعفاع ولا غيرو.
دابا عندها فريق فالبرلمان كاع وهاديك ماشي سياسة. شفتيهم كيدافعو على مصالح الباطرونا. كيدافعو على مصالح احزاب على حساب كانة المخزن واللي حطهم تماك.
اللي كنتي تقدر تقولو لو انك يا ملياردير بصاح شجاع هو تربط مع انتماؤو الحزبي وهاد المنصب. هو رئيس سابق جابوه للتجمع الوطني للاحرار ولاحوه منو. دابا الاحرار كيوجد ل2021 باش يربحها وهما كيوجدو دعم ليه فالباطرونا.
اما الاستقلالية لخاوية والوساطة العوجا راك غير كتكور وتعطي للعور