رحيل ذاكرة للتلفزيون. وفاة احمد عمار اول مخرج دار الديريكت فالتلفزة المغربية. والد الصحافي علي عمار كان عيط ليه الحسن الثاني وقاليه : دوزتيني ف التلفزة بحال شارلو: تصاور حصرية وتفاصيل طريفة وقعات ليه مع الملك الراحل

مات السبت الفايت ذاكرة فتاريخ التلفزيون فالمغرب. مات المخرج احمد عمار اول مخرج مكلف بالبث المباشر التلفزة المغربية. هاذ المخرج وهو والد الصحافي علي عمار مدير نشر "لوديسك": كان من الرعيل المؤسس اللي دوزو سطاج ف شبكة راي الايطالية وشكلو النواة الفنية والتقنية ديال دار البريهي.
مجلة "تيل كيل" نشرات ف 18 – 24 أبريل 2009 ، ملف على الراحل الحسن الثاني وعلاقتو بالبروباگندا وفيه تصريحات للمرحوم أحمد عمار حكى فيها على بداية البث المباشر للأنشطة الملكية والطرائف اللي طراو ليه مع الراحل الحسن الثاني.
ف 3 مارس 1962، كانت بداية التلفزة المغربية مع خطاب ملكي مباشر، الحسن الثاني بغا يدشن بدايات البث التلفزي بخطاب العرش وطلب رجوع التقنيين المغاربة اللي مشاو يتكونو ف الخارج بالزربة، هاذ الشي اللي وقع حسب احمد عمار، ونهار قبل بث الخطاب، مشا للقصر الملكي باش يشوف ظروف التصوير ولقا ان المنصة الملكية فبلاصة مظلمة غير مناسبة للتصوير بالنهار، شرح٬ كما قال فحوارو مع "تيل كيل"٬ هاذ الشي للوزير احمد العلوي اللي ما فهم والو، ثم تدخل الراحل الحسن الثاني وقاليه خود وقتك كامل وشرح لي اش وقع، ومن بعد أمر الملك العساكرية باش يحولو المنصة لبلاصة مناسبة وخطب فالغد مع 10 ديال الصباح لمدة ساعة ونص كاملة وداز كلشي على خير..
المخرج الراحل وقعو ليه بزاف ديال الطرائف المهنية المتعلقة بتغطية الانشطة الملكية، منها واقعة بتاريخ 26 مارس 1962، تم خلالها استخدام كاميرا متطورة بمعايير هذاك الوقت تم شراءها لفائدة التلفزة المغربية، الواقعة حسب احمد عمار، كتعلق بحفل تدشين ف القنيطرة حضرو الحسن الثاني، وف خلال المونتاج، شي تقني ارتكب خطأ، بان فيه الحسن الثاني كيمشي بالزربة خلال نشرة الاخبار.
بعد وقت قصير، كما روى الراحل عمار، جاه تيلفون وتكلم معاه واحد قاليه٬ كيف قال فالحوار نفسو مع "تيل كيل": "واش هاذ التلفزة المغربية؟"، جاوبو المرحوم عمار: "إييه.. شكون معايا؟"، ثم جاوبو الشخص المجهول : "نتا إللي شكون"، عرف المخرج عمار، أن اللي على تيلفون هو الحسن الثاني اللي ف بلاصة قاليه "دوزتيني ف التلفزة بحال شارلو" وختم معاه المكالمة بعد ما وصاه انه ف حالة وجود مشكلة تقنية خاصهم يرجعو للديوان الملكي بلا يدوزو على وزارة الانباء اللي كيترأسها احمد العلوي.