مبابي دار ريمونتادا فرنسية أمام الأرجنتين ففينال كأس العالم والماتش مشى للأشواط الإضافية

سالا الوقت الأصلي من نهائي كأس العالم قطر 2022، اليوم الأحد فتيران لوسيل فالعاصمة القطرية الدوحة، بالتعادل الإيجابي بين الارجنتين وفرنسا بهدفين لمثلهما، وهادشي من بعدما دار المنتخب الفرنسي بريمونتادا فاللحظات الاخيرة من الماتش وقدر يجيب التعادل فوقت كان فيه منتخب الأرجنتيني فطريقو للصعود إلى منصة التتويج باش يهز كأس العالم حيث كان متقدم بهدفين لزيرو إلى حدود الدقيقة 80.
وقدر منتخب الأرجنتيني يخرج متقدم فالشوط الأول بنتيجة 2 أهداف لزيرو أمام فرنسا، وسجل الهدف الأول الكابيتان ديال المنتخب الأرجنتيني ليونيل ميسي من ضربة جزاء تحصل عليها أنخيل ديماريا فالدقيقة 23، ومن كونتر أتاك قدرو اللعابا الأرجنتين يسجلو الهدف الثاني بواسطة أنخيل ديماريا فالدقيقة 36.
وانتظرت فرنسا الشوط الثاني للرجوع فنتيجة الماتش قدرت تماركي فالربع ساعة الأخيرة من ماتش الفينال بهدف أول من بيلانتي سجلو كيليان مبابي فالدقيقة 80 ورجع بسرعة مبابي وسجل هدف التعادل لفرنسا فالدقيقة 81، فسيناريو مشوق لماتش الفينال حيث حتى حد ما كان كيتوقع ترجع فرنسا فنتجية المباراة قوقت كانت فيه الأرجنتين مسيطرة على الماتش مزيان.
ومن بعدما سالا الوقت الأصلي ما بين الأرجنتين وفرنسا بالتعادل الإيجابي بنتيجة 2 أهداف لكل منتخب، غادي يلعوب الطرفين الآن الأشواط الإضافية لحسم المتوج بكأس العالم 2022، وفحالة ظلت النتيجة بالتعادل غدا يلعبو ضربات الترجيح باش واحد فيهم يربح اللقب العالمي للمرة الثالثة.فالتاريخ ديالو.