هذا استهتار واستخفاف بالمواطنين.. تواصل وزارة الصحة فأزمة كورونا فالصو.. اليوم تعطلات بزاف فالإعلان على الإصابات الجديدة بسبب "عطب تقني".. وشي مديريات جهوية مابقاوش يعلنو على التفاصيل الوبائية هذي أكثر من شهر ونص

وزارة الصحة تعطلات بزاف فالإعلان على الإصابات الجديدة بفيروس كورونا المستجد فالموقع الرسمي للترصد الوبائي، بحيث فالأصل الوزارة كتحين المعطيات جوج مرات فالنهار، مع 10 دالصباح ومع 6 دالعشية، لكن هذ النهار ماحترماتش الموعد.
الوزارة مادارت حتى بلاغ رسمي على سبب هذ التأخير، باستثناء ميساج صغير من المكلف بالتواصل فوزارة الصحة، رشيد الخداري، اللي قال فالمجموعة الإعلامية الخاصة بالتواصل مع الصحافة عبر تطبيق واتساب، أن الوزارة "كتعتذر على هذ التأخير، حيت وقع مشكل تقني خارج عن إرادتنا".
الصحافيين عبرو على الاستنكار ديالهم، فالمجموعة الإعلامية نفسها، واعتبرو الوزارة ناعسة وماكتديرش خدمتها، وأن وقتهم أثمن من أنهم يبقاو عاسين على الموقع أكثر من ساعة، بلا ما يعرفو حتى حاجة على فوقاش غيتم تحيين المعطيات.
والمشاكل التواصلية ديال الوزارة بالعرام، وهذا غير شوية من بزاف، مثلا فهذ الآونة الأخيرة كيمكن للملاحظ يستنتج الارتفاع الكبير اللي ولا فعدد الوفيات بالفيروس، وخصوصا فجهة طنجة تطوان الحسيمة، لكن ماكاين حتى تفسير عطاتو الوزارة او المديرية الجهوية على هذ الارتفاع.
وماشي غير هذشي، شي مديريات جهوية مابقاتش كتعطي التفاصيل ديال الحالة الوبائية من مدة طويلة، واللي هي المديرية الجهوية للصحة فجهة العيون الساقية الحمرا، اللي كان آخر تحيين ليها نهار الأحد 12 يوليوز، ومديرية الرباط سلا القنيطرة اللي كان آخر تحيين ليها ف10 يونيو، بلا مانهضرو على جهة كازا سطات اللي ماحينات معطياتها من 6 يونيو واخا هي الجهة الأكثر تسجيلا للإصابات، وفات عدد الإصابات فيها سقف 4000 حالة.
بالإضافة لهذشي، كاين مشكل فعدم تطابق النسب المئوية اللي كتعطي وزارة الصحة، والخاصة بمجموع الإصابات فالجهات، مع الأرقام اللي كتعطي المديريات الجهوية، فعلى سبيل المثال جهة بني ملال عالنة على 177 مصاب بكورونا، لكن الوزارة عاطية نسبة 1,10 فالمية، واللي يلا حسبتيها غتعطيك 184 إصابة ماشي 177.